Théo place, étudier sérieusement la parole
Samuel Logan Brengle Vers la sainteté (pdf) téléchargement

Tous droits réservés
© Théo place - 2023

Luc 21
Versets liés

L’ufferta di a veduva

1 Fighjulendu bè, Ghjesù vide i ricchi chì lampavanu i so doni in lu tisoru di u tempiu,
2 è vide una veduva misiriosa chì ci lampava dui soldi, è disse :
3 « Da veru a vi dicu, issa tinta veduva hà messu più ella cà tutti quill’altri,
4 chì elli anu datu doni cù u so soprappiù, ma ella, misiriosa è bè, hà lampatu tuttu ciò chì era u so ghjuvevule par campà. »

Annuncia a distruzzione di u Tempiu

5 Mentre chì unipochi parlavanu di u tempiu è dicianu ch’ellu era adurnatu di belle petre è d’oggetti ufferti à Diu, Ghjesù disse :
6 « anu da vene i ghjorni chì, di ciò chì vo guardate, ùn firmarà una petra annantu à l’altra chì ùn sia lampata in tarra. »

Annunciu di a fine

7 Li chersinu: « o Maestru, quandu accadaranu isse cose ? È qualessu sarà u segnu di ch’elle anu da accade ? »
8 Ellu disse : « attenti à ùn fà vi ingannà ; chì parechji vinaranu in nome meiu, dicendu : ‘sò eiu !’ è ‘u mumentu s’avvicina’, ùn l’andate apressu, nò.
9 Quand’ì vo sintarete ch’ellu ci hè guerre è cumbugli, ùn vi spavintate chì ci vole chì isse cose accadinu prima. Ma ùn sarà subitu a fine. »
10 Tandu li disse : « una nazione si farà numica d’una antra nazione è un regnu d’un antru regnu,
11 è ci saranu i tarramoti maiò, è, sicondu i lochi, e peste è e fame nere, è ci saranu i spaventi è i segni maiò vinuti da u cele.
12 Ma prima di tuttu què, vi mittaranu e manu addossu è vi parsiguitaranu, vi daranu à e sinagoghe è à e prighjone da chì voi siate ghjudicati, vi purtaranu davanti à i rè è à i guvernatori, par via di u me nome.
13 È vi sarà l’occasione d’una tistimunianza.
14 Mittite vi puru in capu d’ùn avè da appruntà difesa.
15 Chì à a spirtezza ch’e’ vi mittaraghju eiu in bocca, mancu ci si pudaranu oppone nè purtà ci cuntrastu tutti i vostri numichi.
16 Sarete dati ancu da babbi è mamme, da fratelli, da parenti è amichi, è parechji di voi altri saranu tombi.
17 È par via di u me nome, ognunu vi purtarà odiu.
18 Ma mancu un capellu di vostru andarà di male.
19 À marzè à a vostra pacenzia, acquistarete d’esse vivi. »

Annuncia a distruzzione di Ghjerusaleme

20 « Quand’ì vo vidarete à Ghjerusaleme accampata da l’armate, sappiate, tandu, ch’ella hè vicina a so ruvina.
21 Tandu, quelli chì sò in Ghjudea, ch’elli piglinu e muntagne, quelli chì sò in cità, ch’elli scappinu, è quelli chì sò in campagna, ch’elli ùn entrinu in cità.
22 Chì saranu i ghjorni di u pagamentu, da ch’ellu venga cumpiitu tuttu ciò chì hè statu scrittu.
23 Malasciu à chì avarà figlioli in corpu è à chì darà à sughje in quelli ghjorni ; chì ci saranu, indì sta tarra e disgrazie maiò, è a stizza di Diu contru à stu populu.
24 È cascaranu sottu à u tagliu di a spada, è partaranu prighjuneri in tutte e nazione. è à Ghjerusaleme a si mittaranu sottu à i pedi l’altre nazione finu à ch’elli venganu à fine i tempi di quelle. »

Ghjunghjarà u Figliolu di l’Omu

25 « È ci saranu i segni in lu sole è in la luna è e stelle, è, annantu à a tarra, e nazione intimurite da u rimusciu è u trostu di u mare saranu indì l’affanni.
26 È à l’omi, li sarà toltu u rispiru, da a paura, aspittendu ciò chì hà da accade in lu mondu ; chì saranu smosse e putenze di i celi,
27 è tandu si vidarà u Figliolu di l’Omu chì vene ind’un nuvulu cù a putenza è a gloria maiò.
28 Quand’elle cuminciaranu ad accade isse cose, addirrizzatevi è pisate u capu chì s’avvicina u tempu chì voi sarete salvi. »

U paragone di a fica

29 È li dede un paragone : « guardate a fica è tutti l’arburi,
30 da chì vo i videte ch’elli caccianu, sapete da par voi chì l’istate s’avvicina.
31 Cusì, ancu voi, quand’ì voi vidarete ch’elle stalvaranu isse cose, sappiate chì u Regnu di Diu sarà vicinu.
32 Da veru, a vi dicu, ùn hà da smarrì issa leva ch’elle ùn stalvinu isse cose.
33 U celu è a tarra anu da smarrì, ma e me parolle ùn smarrisciaranu micca. »

Chjama à ch’omu veghji

34 « attenti à ch’elli ùn diventinu pisivi i vostri cori, causa di l’abusi, e briachine è i frastorni di a vita, è chì issu ghjornu ùn ùn vi venga addossu, à l’impinsata
35 cum’ella fala una reta, chì vene hà da vene, addossu à l’abitenti di a tarra sana.
36 Vighjate à ogni siconda è pricate da piglià forza è pudè vi traie da tutte isse cose chì anu da vene, è tene vi arritti davanti à u Figliolu di l’Omu. »
37 Di ghjornu, stava in lu tempiu à insignà, è di notte iscia è si ne andava annant’à l’altura detta ‘di l’Alivi’.
38 E’, à l’alba, tutta a ghjente vinia in lu tempiu à sentelu.

Introduction de la Les Évangiles en Corse

Verset liés

L'outil de verset lié est un instrument précieux qui ouvre des horizons nouveaux dans l'étude biblique. En reliant les versets apparentés au sein des Écritures, cet outil permet aux chercheurs et aux étudiants de la Bible d'explorer les thèmes, les concepts et les enseignements clés à travers différents livres bibliques. Grâce à la fonctionnalité de verset lié, nous pouvons établir des connexions profondes entre les passages, obtenir une compréhension contextuelle plus profonde et saisir la cohérence et la richesse des enseignements bibliques dans leur ensemble. Que ce soit pour des études personnelles, des enseignements ou des recherches plus poussées, l'outil de verset lié s'avère être un compagnon précieux qui enrichit notre exploration des vérités bibliques et renforce notre compréhension globale des Écritures saintes.